【英格蘭狂迷觀戰手記】抽筋成全場焦點…

chan200308

史杜列治迅速扳平令英迷興奮，亦好希望巴洛迪利入波後再重現嗰一幕，不過隨住朗尼黃金機會把握唔到，幾名球員抽筋下，一切結局就好似朗尼開嗰球角球咁…

鶴臣今場擺明相信一眾利物浦中前場球員，希望佢哋打番出紅軍今季水準，中場謝拉特拍佐敦軒達臣、前面有史達寧打攻中，曼聯兩名前鋒朗尼同韋碧克都要讓路打邊，實行要以默契支配史杜列治，不過我相信鶴臣最終目的，係要呢4名球員係前面不斷走位，就連對手都唔知邊個打邊個位置，以及要呢4名球員速度上有優勢…

之不過佢如意算盤打唔響，由兩軍今戰交波次數就顯而易見，英軍受制於意大利控球在腳下，佢哋嘅跑動變成用嚟追波，令佢哋體能上消耗更多，再加上炎熱天氣，去到下半場就將呢個問題暴露，史達寧、謝拉特、史杜列治，甚至加利卡希爾相繼出現抽筋，相反對手意大利仍然從容不迫，令後段都心知英軍要追和，都好有難度。就算鶴臣賽前要佢哋穿咩厚衫訓練，甚至準備每人唔同份量嘅飲品等等部署，完全係今戰都未睇到有咩作用…

個人球員方面，史達寧首次打大賽嚟講表現一啲都唔怯場，只係俾佢發捙速度機會唔多，佢開波初段一腳同交腳波俾朗尼交出助攻，成為佢嘅焦點…至於朗尼，助攻一腳好靚，射近柱埋門一腳差少少，不過要佢出任左翼就好似佢開個角球一樣，唔知去咗邊，佢係有能力勝任，不過無翼鋒意識先係問題，意軍第一球就係喺左邊派路同馬治斯奧都空晒下，輕鬆射入，雖然對手射得靚係入波其中一點，之不過作為左翼，朗尼應該係位於左邊防守而唔係喺中路；意軍下半場亦都特登打英軍左路，就係睇得出巴尼斯一個人守唔住，朗尼有回防防守，但都係重點回中路多，而巴洛迪利嘅入球，亦係由左路產生…

最後就算係英迷，都唔可以唔讚派路，尾段嗰一下罰球真係靚到…希望英軍休息後再重新出發吧! 打番今戰上半場水準，以及希望鶴臣如意算盤打得響，我相信下仗對烏拉圭生死戰有生機!