「巴克里令我想起當年朗尼！」

chan200308

開始感覺巴克里喺呢個moment，準備爆！之前大家仲講估緊拉爾拉拿會跑出，依家睇，巴克里可能先係今屆英格蘭焦點。至於話睇見佢就諗起當年朗尼嘅人並唔係筆者，係林柏特。

「佢兩個有共通點：身型、出處，你唔可以否認，呢種係年青人大無畏嘅力量。」唔知巴克里（Ross Barkley）聽到前輩「林伯」咁讚佢會唔會飄飄然，不過佢的確係前日英軍打和厄瓜多爾2:2場波嘅最大亮點，好多風開始吹佢有機會納入正選。

數據顯示，呢位愛華頓新貴5次代表英軍，只踢154分鐘就為隊友製造4次入球機會，雖然佢同朗尼位置上唔同，但殺傷力一啲都唔輸蝕。再講，佢傳送命中率高達89%，冇得頂。

「好開心第一次為英格蘭踢正選，希望陸續有嚟。」自從好似用膠水黐實個波、好少傳波甩拖嘅加斯居尼後，英軍好少出到呢類球員；自從奧雲喺1998年世盃之前伺機爆發，英格蘭球迷亦好耐冇呢份期待。難得小子有心有力，係英軍福氣。

係咪英國傳媒過份吹捧？唔知，只知踢大賽最緊要係以態為先，到決賽周來臨啱啱好上力，越踢越順固然最好，但英格蘭置身死亡之組，第一場就硬撼4屆冠軍，根本冇條件慢慢上力，球員最好即時「爆」。似乎鶴臣都感到之前咁陣唔夠爆，到決賽周時應該會有驚變，

反正列強唔係有主力傷兵就係冇態，數吓數吓，英格蘭可能會有啲驚喜……