【城迷觀戰周記】點解送走尼格度？

chan200308

「哈哈！又話你隊波好勁！」「講到拜仁慕尼黑都唔驚，結果俾史篤城打巢……。」以上只係被嘲諷嘅節錄部分。自從後上贏得去季聯賽冠軍後，邊城好耐都冇好似上周末咁鬱悶，喺主場對史篤城場波，都算係重創。

重創還重創，我唔會後悔講過班老友所謂「扯高氣揚」嘅話，我真係覺得隊波冇大問題，更重申唔相信球隊跌入咩歐聯死亡之組。一場波，唔通啲人即時將曼城之前打敗利物浦場波忘得一乾二淨，選擇性記憶，好冇品啫。

敢認自己係某一隊波嘅球迷，預咗一沉百踩。我同意呢次對史篤城發揮一般，而阿古路踢番正選反而有啲綁手綁腳，但唔同意領隊柏歷堅尼話豆腐防線。其實場波整體表現唔可以話好差，機會係有，反而一次失策俾人直搗黃龍。輸波個心當然唔舒服，不過輸俾以前領隊，自己都好欣賞嘅曉士，感覺相對冇咁唔舒服。當年曉士帶隊成日和波，結果被炒，如果俾佢教多季，可能係佢領軍捧英超。輸俾自己友，條氣順啲。好阿Q？天下球迷都一樣啦。

輸波之餘，最唔開心係得知隊波外借尼格度，呢樣真係令最人費解，多個有質素嘅前鋒唔好咩？阿古路近年受傷都幾頻密，點解唔留多個人用？講到尾，一個球員初到英超入球有雙位數已經唔錯。唔用都應該「看門口」吧。