CTM死火網民怒吼

東方不敗

澳門電訊3G死火，有人搵仔、搵老公，有人生意做唔成、約客約唔到，要求賠償。網民新仇舊恨一鋪爆發，鬧爆CTM討論區。
    昨日約四時開始，大部分電話打唔到，網又上唔到，很多居民不知就裡，以為手機“打柴”，更有網民懷疑是恐怖襲擊、太陽風暴二○一二先兆。殊不知係澳門電訊3G核心網絡死火。
    上唔到網事小，打唔到電話事大。有人搵唔到老公、老婆，接唔到囝囝、囡囡，心亂如麻。網民“血仍是冷”在討論區留言：“我女人打去公司鬧咗我一輪，話搵我唔到，CTM想點？”“大象哥”更話：“突然感覺好似時光倒退一百年，返到以前科技冇咁發達嘅年代。好鬼死恐怖呀！人同人之間都聯絡唔到。”“膠人”說：“我媽入咗醫院，想通知家姐，而家搵唔到家姐呀！”
    澳門電訊3G收費貴、網速慢，一直被用家所詬病。今次3G死火，網民乘勢叫回水，“小幽生”揶揄：“收錢絕不手軟，網絡隨時中斷!”“Partsman”指出：“建議網費打個七折，否則全澳市民條氣都唔會順。”“luckcibe”更話：“CTM要回水啦，咁耐都用唔返，唔係淨係交代就了事，我冇交電話費，係咪就咁交代吓就冇事先？”
    本報記者