報告無加薪公僕得餐驚

東方不敗

澳門現約有二萬五千名公務員，睇完特首宣讀明年施政報告均失望而回，因睇到乜乜薪酬調整評議會、乜乜機制，至少又要搞一年半載。倘循正常程序，明年加薪幾乎無望，紛紛向傳媒老友打聽。估唔到特首都話，發表完報告都有好多來電問佢到底係點？“因為大家都好關心制度嘅建立，幾時制度建立後評議出來，係咪可以盡快加薪呢？”唔知“希望明年有薪加” 嘅答案，公務員收唔收貨？
    明年施政報告主題“推動經濟適度多元，提高民生綜合水平”，厚達二百三十四版，比今年報告厚咗四十八版，差不多四分之一。不過，明年報告就加入世界旅遊休閒中心內涵參考、完善醫療系統建設方案、非高等教育發展十年規劃等，似乎有唔少水份。撇除內容，明年施政報告撰寫方式有變，行文較為簡潔。如果分段好一點，多一些分段小標題，相信會較易明白、整理。
    明年施政報告雖然厚過去年，特首讀果段報告亦比去年多咗兩版，但特首今日做快槍手，約一個鐘讀完，連埋握手四時十分搞掂。昨日新聞會亦速戰速決，事先講明半粒鐘，有問趁早，讓傳媒有心理準備，免卻去年嘅尷尬場面。綜觀而言，特首今年答問表現確比去年淡定、輕鬆，仲識得講笑，算係有進步。