仁稔當造消滯好味
前幾日去逛街市，見今年仁稔已經上市，睇落青綠新鮮，粒粒都有拇指大細，梗係即刻秤咗一斤返嚟親自炮製。至於係咩用途，等我賣個關子先。
仁稔俗稱人面果，也寫作仁面、仁棯，呢種果子五月開花，夏末結果，當造時間好短。咪睇佢外形普通，其實仁稔有解毒、消滯作用，夏天有時熱到冇晒胃口，食啲酸薑仁稔醬特別開胃。仁稔醬做法好簡單，一般家庭廚房就可以完成。首先將買返嚟嘅一斤仁稔果洗乾淨，用削刀刮走外面嘅青皮，拍扁，然後加水浸過面。跟住放調味料，半茶匙鹽、砂糖八両、辣椒仔一至兩條，再落幾片薑。然後將所有食材大火煮到滾起，再轉慢火煮到起水泡，熄火放涼之後就可以放入玻璃樽儲存。咁樣整出來嘅仁稔醬酸酸甜甜又帶少少辣，用來蒸魚、排骨或者炒菜都特別鮮甜有味，仲可以去除油膩感，十分開胃。有時太懶或者太忙唔想煮餸，直接用仁稔醬配白飯或者撈麵食，一樣好滋味！
如果覺得整仁稔醬太麻煩，直接用仁稔煮餸都得。可以整個仁稔紫薑蒸排骨，營養又簡單，做法都唔難：將肉排切成細件，用調味料攪拌醃十五分鐘左右，然後將紫薑切成粗絲，仁稔刴碎一齊放入，之後大火蒸十分鐘，咁就搞掂。食厭豉汁蒸排骨嘅話，轉個酸甜仁稔口味試吓，仲開胃！
|
|
