月入$6000叫人買$90萬保單滙豐經理涉呃婦孺

剛公佈大裁員的滙豐銀行，被揭「呃」婦孺搶生意。有經理涉嫌誘使月入僅6,000元的中年女工落叠，將畢生30萬積蓄購買實質是人壽保險相連的基金投資。女工以為一次供款將後顧無憂，但近日才驚覺該項投資要連續三年供款，每年供30萬元才能斷尾。女士說該名經理沒有替她進行風險評估。滙豐接獲投訴後正調查事件，消委會亦介入跟進。有資深投資顧問說：「冇可能要佢買咁貴嘢，超出正常近10倍」。「上年年中，我去滙豐打簿，有位姓麥理財經理過嚟望我本紅簿仔，話我有30幾萬存款，可以諗吓投資增值。點知噩夢就咁開始！」王姐嘆道。

收信先知每年要供 30萬

涉嫌呃人投保的姓薛男經理，仍然如常上班。

王姐未有即時答應，她解釋自己只是食肆女工，當時未實施最低工資，月薪只得五、六千元，「我成世人都冇做過投資，亦唔係有錢人，呢30萬係我20幾年，死慳死抵儲返嚟……」。王姐上有年邁的老爺奶奶，下有三名子女，但其中兩人失業，丈夫則是散工，收入不穩定。王姐為多賺一點點，決定嘗試低風險投資，「滙豐點都係大銀行，應該信得過啩！」經家人同意後，王姐在去年10月9日到銀行找該名姓麥經理，但麥當日休假，轉由另一名姓薛的男經理接洽。王姐憶述，薛得知她有30多萬存款後，即將其中30萬，投資在一個名為「滙豐亞洲債券基金」的投資計劃，「有無做風險評估？我淨係記得佢問過我有冇其他戶口，有冇股票」。王姐指出，薛只是向她簡略解釋「啲錢隨時拎得」，卻從未提及30萬是否供款全數，而只有初中學歷的她坦言，自己理解能力不高，只好跟從他的指示，「我信佢嘅專業，會為我好嘛！」直至今年8月，王姐向滙豐查詢收到大叠有關投資計劃的信件，才發現自己原來已「欠下巨債」，「我撞返之前嗰位麥經理，佢話啲信件係通知我基金現況，叫我放心，但佢睇完份保單，就話我仲有兩年供款，每年供 30萬，問我有冇 60萬咁多錢。我聽完即刻呆晒，唔知點算！」

涉嫌騙人經理升職加薪

王姐必須於下月中繳交第二輪的30萬供款，否則投資計劃會自動取消，畢生積蓄凍過水。王姐不敢將真相告知家人，更飽受精神壓力，寢食難安，但負責其個案的薛經理，卻升職加薪，由「財富管理經理」升至「高級財富管理經理」。雖然薛曾就事件與王姐見面，惟他只是勸喻她繼續供款，又警告即時提取供款，會有50%（即15萬）懲罰性費用，令王姐十分憤怒，「點解佢當初唔同我講？咁即係設陷阱害我！」王姐事後已向消委會及金融管理局投訴，消委會表示正調查是否有人作出誤導性銷售。滙豐表示已成立小組調查事件，亦會重新審視王姐的投資計劃，不過涉嫌騙人的經理仍然如常工作。有資深財富策劃顧問指，按正規公司指引，客人的投資供款最多只可佔其總流動資產三分一，而只得 30萬身家的王姐，要供總值90萬的投資計劃，完全超出其能力範圍，「佢頂多只可以做10萬投資計劃，每年供款 3.3萬；但佢鱻家買嘅 90萬計劃，每年供款 30萬，相差接近10倍！」

經理呃人示意圖

1.呃人經理見王姐有 30萬存款，即建議她投資增值

2.經理向王姐宣稱，投資計劃屬低風險，而且能隨時取回款項，王姐信以為真

3.一年後，王姐帶同投資計劃保單和相關信件到銀行查詢，才驚現保單尚有 60萬供款

只得 30萬積蓄的女工王姐，控訴滙豐銀行經理騙她買 90萬保單。

返回列表

月入$6000叫人買$90萬保單滙豐經理涉呃婦孺

[收藏此主題] [關注此主題的新回復]

[通過 QQ、MSN 分享給朋友]